Իւրաքանչիւր անձի նման, մանուկն ալ ունի իր իւրայատուկ եւ անհրաժեշտ իրաւունքները, ինչպէս նաեւ՝ պարտաւորութիւնները:
Մանուկներու իրաւունքներէն են հետեւեալները.- ունենալ ծնողք՝ հարազատ թէ հոգատար, անոնցմէ ստանալ խնամք եւ գուրգուրանք, լաւ սնունդ առնել, առողջ մնալ, զուարճանալ, դպրոց յաճախել, զարգանալ եւ դաստիարակուիլ, արժանապատուութեամբ ապրիլ եւ կարեւորագոյնը՝ հեռու մնալ վտանգաւոր աշխատանքներէ: Մանուկներու պարտաւորութիւններէն են՝ յարգել իրենց ծնողքը, հնազանդիլ անոնց, յարգել ուսուցիչները, վարժարանի պատասխանատուներն ու օրէնքները, կիրթ եւ համեստ կերպով վարուիլ դասընկերներու եւ այլ շրջապատի պատկանող մանուկներու հետ: Սիրով եւ քաջալերանքով ներշնչուած մանուկ մը ինքզինք ապահով եւ ուրախ կը զգայ եւ ապագային օրինակելի մարդ կը դառնայ: Մարք Կիւլկիւլեան -------------------------------------------------------------------------------------------------------------------------------------------------------- Մանուկի մը իրաւունքները եւ պարտաւորութիւնները կարեւոր են որպէսզի ան ուրախ կեանք ապրի: Հայ մանուկին իրաւունքներն են հայկական դպրոց յաճախել եւ հայօրէն դաստիարակուիլ, իրաւունք ունի մաքուր բնակարանի մէջ ապրելու՝ իր ծնողքին հետ, բժիշկի երթալու՝ կարեւոր պատուաստներ ստանալու համար, սննդարար ուտելիքներ ուտելու՝ առողջ ըլլալու համար; Ան պէտք է հեռու մնայ նաեւ վայրագութենէ եւ ծեծէ, որովհետեւ գուրգուրանքի պէտք ունի, ինչպէս նաեւ մանուկ մը իրաւունք ունի խաղալու եւ պտտելու մաքուր բնութեան մէջ: Մանուկին պարտաւորութիւններն են՝ յարգել իր ծնողքը եւ ուսուցիչները, որովհետեւ անոնք կը զոհուին իրեն համար, մաքուր պահել իր տունը, դպրոցը եւ ճամբաները, ընկերներուն հետ զգուշութեամբ խաղալ, բծախնդրօրէն կատարել դպրոցի պարտականութիւնները եւ դասերը լաւ սորվիլ, մաքուր պահել իր մարմինը եւ համազգեստը, միշտ լոգնալ, երեկոյեան կանուխ ժամերուն քնանալ: Քրիստ Թաթօ -------------------------------------------------------------------------------------------------------------------------------------------------------- Աստուած կեանք շնորհեց մարդ արարածին, եւ ան իր ծնունդով ունեցաւ ապրելու իրաւունքներ եւ պարտաւորութիւններ: Համշխարհային օրէնքին համաձայն, մանուկները ունին իրաւունքներ, նաեւ՝ պարտաւորութիւններ: Անոնց իրաւունքն է իրենց ծնողքէն գուրգուրանք, լաւ հոգատարութիւն ստանալ, եւ բացարձակապէս արգիլուած է ծեծել մանուկը եւ նաեւ պատժել զայն առանց ցոյց տալու անոր սխալը: Միշտ խրատական խօսիլ անոր հետ եւ ժամանակ յատկացնել անոր եւ յարգել զայն: Անոր համար պատրաստել հանգիստ մթնոլորտ՝ դպրոց յաճախելու եւ ուսանելու, որպէսզի երբ մեծնայ, պիտանի մարդ դառնայ եւ երբեք խտրութիւն կամ տարբերութիւն չդնէ մարդոց միջեւ: Նաեւ մանուկները պարտաւորութիւններ ունին, որոնց պարտին հետեւիլ: Պէտք է մանուկը հաւատարիմ ըլլայ ծնողքին: Ան պէտք է լրջօրէն հետեւի դպրոցի դասերուն, յարգէ իր ծնողքը եւ բոլոր անոնք որոնք տարիքով մեծ են, պէտք չէ միջամտէ մեծերու նիւթին, ըլլայ ճշմարտախօս, կոկիկ եւ տէր դառնայ իր առարկաներուն: Այսպիսով, երբ ամէն մարդ գիտնայ իր իրաւունքներն ու պարտաւորութիւնները, կ՛ապրին համերաշխ եւ երջանիկ: Անժելինա Քեքլիքեան -------------------------------------------------------------------------------------------------------------------------------------------------------- Շատ անգամ, երբ մանուկ մը տեսնեմ փողոցը, որ կը մուրայ՝ դպրոց երթալու փոխարէն կամ ծաղիկ կը ծախէ, խաղավայրի մը մէջ խաղալու փոխարէն, առիթ կու տայ ինծի մտածելու, թէ մանուկ մը իրաւունքներ ունի, ապահով միջավայրի մէջ մեծնալ եւ ոչ փողոցները, ինքնաշարժներու մէջ: Մանուկի մը իրաւունքն է ուսանիլ, նոյնիսկ եթէ աղքատ է: Մանուկի մը իրաւունքն է ուրախ ըլլալ՝ ստանալով պէտք եղած սէրը եւ հոգատարութիւնը իր ծնողքէն, ազգականներէն եւ ամբողջ շրջապատէն: Մանուկի մը իրաւունքն է ունենալ ապահով խաղավայրեր: Մանուկի մը իրաւունքն է ստանալ ճիշդ սնունդ եւ հագուիլ մաքուր հագուստներ: Նաեւ յիշենք, որ մանուկ մը պարտաւորութիւններ ալ ունի, ինչպէս՝ մաքուր ըլլալ, իր շրջապատը մաքուր պահելով, հոգատար ըլլալ իր գործածած պիտոյքներուն՝ դասարանին կամ տան մէջ, նեղութիւն չտայ իր շուրջիններուն, այլ ըլլայ յարգալիր, լաւագոյնը տայ իր ուսման եւ ինքնազարգացման մէջ ռւ միշտ գոհունակ ըլլայ իր ունեցածովը: Սերժ Գիրազեան
0 Comments
Leave a Reply. |
ՄԵՆՔՄեսրոպեան Վարժարանի Աշակերտներ Արխիւ
April 2015
Categories
All
|